Dda Lmulud At Mammer :
Ass n ssebt tameddit ,
Rzag d lhentit ,
Yergagi lhed mi yesla .
Yebbwi-d lexbwar tasebhit ,
Gher tudrin yessawed-it ,
Slan yakw di yal tama...
Lmut lsas thudd-it ,
Asalas tesghedel-it ,
Tagejdit terrez di tsnasfa...
Ansi - d tekka mi tebbwi-t ,
Tedja-yagh-d targagit ,
Ghef idammen-is teswa lhelya ...
Ttejra uheccad tenquqel ,
Tessenhez yakw leqvayel ,
Ataya lehzen am ttlam...
Dda Lmulud udem-is infel ,
Si ddunit gher ddaw wakal ,
Yemmut Rebbi at yerhem...
D amusnaw nes3a-t di lbal ,
Iteddu issekfal ,
Ayen yakw yetsnad ' iwalem ...
Ay atma kkert an-neddukel ,
D abrid-is at nkemmel ,
An-nawed s anda yessarem...
Tebbwi-t lmut ur yebni ,
Yefrar degw At Yanni ,
A Rebbi wa d lmuhal...
A yatma iherrek Djerdjer ,
M ' id yebbwed lexber ,
Dda Lmulud yufeg rruh-is ...
Ma d ' assa medlen lecfar ,
Cudden-as axesmar ,
Dayen ad ighab wudem-is...
Ass nni ad as necfu ,
Di lkaghed at - naru ,
Warem semmus di furar...
Yefsex yetri degw ' agu ,
Si lehzen am wabbu ,
D ttlam yugh-ed idurar...
Ilaq fell-as ad nehku ,
Degw mezruy at-nes3u ,
Amazigh as yeg leqrar .
- Mohamed Serkas - ( poète kabyle )
&&&--------------------------------------------&&&
Amzun d itij m id yecreq ,
S tidets d lheqq ,
Idal-ed usigna ighum-it....
Ata wul fell-as yehreq ,
Ma t-tasa tceqqeq ,
Atas i tehzen terwiht...
Dda Lmulud yednegh yefreq ,
Ned3a-k a Lxaleq ,
Gher ldjennet n ddwam awi-t....
W ad 3ezzigh At M3emmer ,
D tmurt n Ldzayer ,
Di mmi-s itr ' ixesfen ...
Ass mi yella yedder ,
Yefrur ' inewwer ,
D lqewdra it-id yessafen ...
Rebbi degs agh - yazen ssber ,
Adyifrir dder ,
Si ledjruh yessenzafen ...
W ad-3ezzigh iman-iw ,
Ghas ru ay izri-w ,
Ma tjerhed ghur-ek lheq...
D lmghidat af wehbib-iw ,
Arfiq n temzi-w ,
Si ddunit yed-negh yefreq ...
Walli-t s rrehma a bab-iw ,
Tsebbred ul-iw ,
Sexsi ajajih la ireq ...
I kwunwi ay arraw-is ,
Refdet leqlam-is ,
Ddut d webrid yettef ...
Tughem-ed azar si lasel-is ,
D tmusni n yiles-is ,
Selfet i wul ma yendef ...
Degwen anzer lexyal-is ,
Teb3et abrid-is ,
I gh - yendjer akken issulef ...
Yewwet-agh lmus n lqedra ,
Ayen yedran yedra ,
Lkas n lmijal yetchur ...
Lemmer imetti id-yetsarra ,
D useggem isefra ,
Yalef it - neddja d amuddur ...
Yebbwed lajel id as yura ,
Di yal timura ,
Lehzen fell-as yetsimghur ....
Ma ighab ghef tit yughal-ed ,
Ass ag ' ilul-ed ,
D ajdid uqebl ad yentel ....
Ma iruh yeddja-d irgazen ,
At wekti yewzen ,
At id xelfen deffir-s ...
Deg webrid-is ad ssughlen ,
Asalu at-gezmen ,
I wmazigh ibedd isem-ines ...
Irgazen deffir wiyad ,
Tasuta id - trebbad ,
D azar n tidets isehhan ...
Gen a gma tethennad ,
D udem uxellaq it walad ,
Anef i ddunit mm urfan ...
Ghur-negh isem-ik d amuddur ,
Ad idum tsfakur ,
Alamma tefna ddunit ...
S lqerh-ik ul d amedrur ,
Tasa tetsquddur ,
Akka i lbadna n txelqit ...
Aqlagh deg wexxam n leghrur ,
Nusa-d kan anzur ,
Ghur Rebbi at-tughal terwiht ...
Ghas yetswantel deg wakal ,
Isem - ines yuklal ,
Ad idum deg wulawen ...
Almud yeflalin amm zal ,
S tsbut d wawal ,
D lqedr-is it yessawden ...
Ghas ma yebbwi-k lmijal ,
Iwehh ' aderghal ,
Kkes-as calwaw is innden ...
Win d agerruj At M3emmer ,
Ghef uqerru yecher ,
Yefka-d ttya amm itij ...
Yerna-d lherma i Ldzayer ,
Nnur-is akter ,
Tafat-is l ad - tetsfedjidj ...
D abrid i tegmats yendjer ,
S wezref yedher ,
Yessagh tafat segw yirrij ...
Arraw n Lmeghreb yerkwel ,
Tamazgha teddukel ,
D imetti yuddam yezri ...
Deg wakal azekka-s yergel ,
Di tegna yentel ,
Yuli rruh-is s igenni ....
Ak nessawad rrehma ,
Seg imawen n llumma ,
Sghur watma-k d imelyunen ...
Ak yerhem Rebbi agma ,
A mmi-s n yemma ,
T-tamazight igh yessutetden ...
Rruh-ik di ldjennet qsada ,
Ad yili dinna ,
lmalayek yisse-k ferhen ...
A lxaleq bab lqedra ,
Kkes-agh ddrura ,
A win ur trebba yemma-s ....
Ned3a - kin s lanbiya ,
D bab n ccfa3a ,
D rrehma - k at - dum fell -as .
Hamane Abdellah ( poète et écrivain kabyle )
